قررت أسامح

الكل يلوم والكل يعاتب والكل يشوف إني غلطانه وقاعده اتصرف على غير عادتي وقاعده أقسّي قلبي غصب عني بس هذا كله ما صار من عبث كان نتيجة تراكمات تحملت مرة وما ني مستعده اتحمل أكثر.. أحس طيبتي او بالأحرى طيبتنا قاعده تاخذنا من نفسنا وقاعدين نفقد وجودنا من كثر ما إحنا طيبين ..تخيلوا هالشخص يكون قريب منك وتلتقي فيه مرات وايد عايش معاك بنفس المكان يقعد ويقوم وياك وياكل ويشرب ويتنقص لك من اللي ياكله ويتعنى لك ليما مكانك عشان اييب لك شي.. بشنو تفسر كل تصرفاته انه يحبك ..صح ماكو غير هذا التفسير ..وفجأه يصير ند لك ويحاسبك ويعاتبك نتيجة خلاف ما لك دخل فيه يا توقف معاي ولا بعتبرك ظالم ومو واقف وقفة حق ..و لأنه بيوم تنقص لي وتعنى لي من وجهة نظره صار واجب علي أوقف معاه حتى لو ما كان على صواب ..شصاير وشنو اللي صار استغربت واستنكرت كل شي غرب دشوا بيتنا وتكشفوا علينا ..صار فينا خرعه ما تعودنا على هالإسلوب من التعامل ..هل هذا نتيجة الطيبة شنو ليش محد يحسب لنا حساب لأنه إحنا وايد طيبين ..وحمى الوطيس وصرت أنا مذنبة ..وما قدرت كل اللي سواه عشاني وحطيته عزكم الله تحت ريولي.. شنو هالكلام ما أعرف ارد على ناس جذيه.." شنو أنا وين عايشه!!!!!" ما أعرف اتكلم مثلكم مع العلم إنه هالشخص يصغرني بسنوات ..هل أنا من النوع الحريص على اختيار الكلمات عشان ما أجرح اللي جدامي منو فينا تصرفه صح .......؟؟

عقب فتره وعقب ما هدت النفوس هالشخص وصل ليما باب بيتي بس للأسف ما قدرت استقبله لا تلوموني اللي صار معاي مو شويه أهو اللي حدني على هالشي ..

وايد تضايقت ماني عارفه ليش لأنه ما استقبلت هالشخص أو لأني شفته بعد المشكلة اللي صارت ..

او تضايقت لأني ما سمعت منه ..ما أبي تكون بيني وبينه أي علاقه ليش يايني شاللي حادك انت اللي اتهمتني بالغلط والحين يايني او وين عند باب بيتي شنو تتوقع مني آخذك بالأحضان ( مستحيل )..

مرت الأيام والليالي والكل سامح ..عداي أنا الكل عادي عنده بس أنا ..منو غلط ؟؟؟؟ معقوله كلهم غلط وأنا صح ..

اللي معور قلبي محد عاتب ولا حاسب الكل اكتفى بالسلام وإن فتح موضوع هالشخص تجاوبوا معاه بس أنا ما أقدر حتى أحط عيني بعينه ..مع إنه الغلط مو مني ..بس شنو هالنوع من البشر يجرح ويداوي !!!!!!!!!!!!!!!!!!!

بعد مده من التفكير قلت لنفسي هذي مو إنتي.. بس أرد واقول ويع من أشوفه تلوع جبدي ..

بس هزني موقف إنه بيوم بالغلط عيني يت بعينه وحسبته شخص ثاني ابتسمت وحسيت الدنيا ما شالته ..نزلت عيني واكتفيت بالسلام يدا بيد..

انكسر خاطري عليه معقوله ياينا بقلب ثاني ..بقلب يحبنا ويبي لنا الخير ..معقولة بكون غير ..( شيطاني يقولي لا لا تصدقين اللي يخطر على بالج )

فكرت وفكرت واستشرت والكل أيدني ..سامحي ..هذي إنتي ..

الكل فرح بهالقرار وانا أولهم وودي أصارح وأعاتب وأسأل عن كل شي بنفسي ..وليش صار جذيه وليش صار جذيه عشان تصفى النفوس ..

التسامح شي كبير ....والله يقدرني وأسامح

والمسامح كريم ..

بس بقولكم شي أنا عيزت من الطيبة ..ودي أتغير ما أكون شريرة بس أبي آخذ حقي مو أكثر ..